اسلام آباد – 07 جون (اي پي پي) مسلم ليگ (ن) جي چيئرمين ۽ قائد ايوان سينيٽر راجا ظفرالحق چيو آهي ته پاڪستان ۽ سعودي عرب جي وقت ۾ فرق آهي جنهن سبب هڪ ئي وقت ۾ نماز ۽ هڪ ئي ڏينهن روزي ۽ عيد جو اعلان نه ٿو ڪري سگهجي، ملائيشيا ۾ رويت هلال سائنسي بنيادن تي ٿيندو آهي، هنن ان حوالي سان ڪافي ڪم ڪيو آهي. سينيٽ جي اجلاس ۾ قائد ايوان سينيٽر راجا ظفرالحق چيو ته حديث ۾ چنڊ ڏسي روزو رکڻ ۽ عيد ڪرڻ جو حڪم آهي، سعودي عرب ۾ حج جون تاريخون به سعودي حڪومت طئي ڪندي آهي ۽ اسان ان کي ئي مڃون ٿا پر اسان جو هنن جو ٽائيم جو فرق آهي، هڪ وقت نه نمازن جو طئي ٿي سگهي ٿو نه رمضان جي روزن ۽ عيدن جو. پشاور ۾ مخصوص مسجد وارا اعلان نه ٿا ڪن پر پيروي سعودي عرب جي ئي ڪن ٿا.
