آستانہ۔12اکتوبر (اے پی پی) وزیراعظم محمد شہباز شریف پاکستان اتے آذربائیجان وچال توانائی دے شعبے اچ نیڑے دے تعاون کوں ودھاوݨ دی لوڑھ تے زور ݙیندیں ہوئیں آکھیا جو توانائی دا شعبہ اڄوکی حکومت دی پہلی ترجیح اے جݙانجو وزیراعظم اتے آذربائیجان دے صدر ݙوہیں ملکاں وچال توانائی دے شعبے اچ تعاون بارے ڳالھ مہاڑ تے اتفاق کیتا۔ بدھ کوں وزیراعظم آفس دے میڈیا ونگ توں جاری پریس ریلیز موجب وزیراعظم شہباز شریف سیکا کانفرنس دے چھینویں سربراہی اجلاس دے موقع تے آذربائیجان دے صدر الہام علیوف نال ملاقات کیتی۔ ملاقات اچ ݙوہیں رہنماواں تجارت، سرمایہ کاری، تعلیم، انفارمیشن ٹیکنالوجی، سیکورٹی، زراعت، رابطے اتے توانائی دے شعبیاں اچ تعاون کوں ٻیا ودھاوݨ کیتے نیڑے دے اتے خوشگوار ݙو پاسہ تعلقات دا جائزہ ڳھدا۔ ملاقات اچ آپسی دلچسپی دے علاقائی اتے عالمی معاملیاں تے وی ڳالھ کیتی ڳئی۔ وزیر اعظم صدر علیوف کوں پاکستان اچ چھل توں متاثرہ لکھاں لوکاں دی بحالی اتے غیر معمولی موسمیاتی تبدیلی پاروں قدرتی آفات نال تھیوݨ آلے انہاں دے روزگار دی بحالی کیتے حکومتی کوششاں بارے وی ݙسیا۔ آذربائیجان دے صدر ایں بارے آپݨے تعاون دا یقین ݙوایا۔ ۔وزیراعظم شہباز شریف جموں تے کشمیر تے آذربائیجان دے ٹھوس موقف اتے جموں و کشمیر تے او آئی سی رابطہ گروپ دے رکن دے طور اوندے کردار دی تعریف کیتی۔ ݙوہیں رہنماواں ݙوہیں ملکاں وچال توانائی دے شعبے اچ تعاون تے ڳالھ مہاڑ کیتی۔ ستمبر 2022 اچ سمرقند، ازبکستان اچ شنگھائی تعاون تنظیم دے بعد ݙوہیں رہنماواں دی اے ݙوجھی ملاقات ہئی جئیں پاکستان اتے آذربائیجان وچال ہم آہنگی دی عظیم روایت کوں برقرار رکھیندیں ہوئیں کثیر الجہتی اقتصادی روابط اتے تعاون کوں متحرک کرݨ دا ہک ٻیان نتیجہ خیز موقع ݙتے۔
