اسلام آباد۔16جون(اے پی پی)صدر مملکت ڈاکٹر عارف علوی پاکستان دے کاروباری و صنعتی شعباں دی کارکردگی اتے پیداواری صلاحیت ودھاوݨ دے نال نال مسائل حل کرݨ کیتے مصنوعی ذہانت دے استعمال تے زور ݙیندے آکھیے جو انفارمیشن ٹیکنالوجی اچ غیرمعمولی ترقی کاروبار و صنعت کاراں کیتے صحت، تعلیم، کاروبار اتے صنعت دے مختلف شعباں اچ نویں مواقع پیدا کیتن، آئی ٹی کمپنیاں کوں انہاں مواقع توں فیدہ چاوݨا چاہیدے۔ صدر مملکت اے ڳالھ آرٹیفیشل انٹیلی جنس ایجوکیشن فائونڈیشن دے وفد نال الیندے آکھی۔ ایں موقع تے سولیٹن انویسٹمنٹ فنڈ دے چیئرمین ڈاکٹر منصور علی خان، سولیٹن گروپ دے بانی اتے سی ای او ڈاکٹر فوزیہ خان، وزارت آئی ٹی اینڈ ٹیلی کمیونیکیشن دی نمائندہ اتے حکومت دے اعلیٰ حکام شرکت کیتی۔ وفد نال الیندے صدر پاکستان دی آئی ٹی کمپنیاں کیتے مقامی اتے بین الاقوامی سطح تے تعلیمی اداریاں اتے صنعتاں نال شراکت داری ودھاوݨ تے زور ݙتے۔
