اسلام آباد۔21دسمبر(اے پی پی) صدر مملکت ڈاکٹرعارف علوی بنوں اچ دہشت گرداں دی کارروائی ناکام بݨاوݨ تے انہاں دے خلاف کامیاب آپریشن تے سیکیورٹی فورسز کوں مبارخ ݙٰندے ہوئیں آکھیے جو کامیاب آپریشن سیکیورٹی فورسز دی پیشہ ورانہ صلاحیتاں اتے دہشت گردی دے خلاف غیر متزلزل عزم دا اظہار اے۔ ایوانِ صدردے پریس ونگ توں جاری بیان موجب صدر مملکت آکھیے کامیاب آپریشن تے سیکیورٹی فورسز دی قیادت اتے آپریشن اچ حصہ گھنݨ آلے اہلکاراں کوں مبارخ ݙیوݨ چاہنداں ۔ انہاں آکھیے قوم وݙیاں قربانیاں ݙے تے ملک کوں دہشت گردی توں آزاد کیتے ، ایں جذبے نال دہشت گردی دی باقیات کوں ملک توں مکمل طور تے مکاوݨاں ہوسی ،قوم ملکی دفاع اتے سلامتی کیتے دہشت گردی دے خلاف قربانیاں کوں ہمیشہ یاد رکھیسی ، پوری قوم دہشت گرداں دے خلاف کارروائیاں تے آپݨی بہادر سیکیورٹی فورسز دے رلے ہے۔ ڈاکٹر عارف علوی آپریشن اچ شہید تھیوݨ آلے اہلکاراں کوں خراج عقیدت پیش کریندے ہوئیں انہاں دے اچے درجے کیتے دعا کیتی ۔ صدر مملکت آپریشن اچ زخمی اہلکاراں دی وختی صحت یابی کیتے وی دعا کیتی ۔
