اسلام آباد۔24جنوری (اے پی پی) وزیر خارجہ بلاول بھٹو زرداری آکھیا جو سارے ملکاں کوں موسمیاتی تبدیلیاں نال نبڑݨ کیتے ہنگامی بنیاداں تے کم کرݨا پوسی۔ گلوبل وارمنگ پاروں پاکستان اچ گلیشئر تکھے پڳھلدے پئن۔ پاکستان مسئلیاں دے حل کیتے سارے ملکاں نال کم کرݨ تے یقین رکھیندے۔ خطے دی چنڳائی کیتے رَل تے کم کرݨ دی لوڑھ اے۔ اے ڳالھیں انہاں منگل کوں ازبکستان دے دارالحکومت تاشقند اچ اقتصادی تعاون تنظیم (ای سی او) دے 26 ویں وزارتی کونسل دے اجلاس توں خطاب کریندیں ہوئیں آکھی۔ وزیر خارجہ بلاول بھٹو زرداری خطے دی بہتری کیتے رَل تے کم کرݨ دی لوڑھ تے زور ݙیندیں ہوئیں آکھیا جو دنیا کوں معاشی، موسمیاتی تبدیلی اتے اسلاموفوبیا جیھے مسئلے ہن۔ ہݨ کیتے ڳے اقدامات اساݙے مستقبل کوں طے کریسن۔ انہاں آکھیا جو پاکستان مذاکرات نال مسئلے حل کرݨ تے یقین رکھیندے۔ اساکوں خطے دی بہتری کیتے رَل تے کم کرݨ دی لوڑھ اے۔ 2022 اچ پاکستان کوں تاریخ دے بدترین چھل دا سامݨا کرݨاپیا۔ بلاول بھٹو زرداری آکھیا جو اڄوکے چھل پاروں پاکستان دا 30 ارب ڈالر دا ضیان تھیے۔ چھل پاروں ترائے کروڑ توں ودھ لوک متاثر تھین۔ چھل متاثرین اتے معیشت دی بحالی پہلی ترجیح اے۔
