اسلام آباد۔15ستمبر(اے پی پی):نگراں وفاقی وزیر خزانہ، محصولات و اقتصادی امور ڈاکٹر شمشاد اختر آکھیے جو کلی معیشت دے اشاریاں اچ بہتری نال معیشت دی بحالی ݙسدی پئی اے، ٹیکس نظام کوں مرکزی دھارے اچ رلایا ویسی، ٹیکس بنیاد ودھاوݨ کیتے قانون سازی دے علاوہ ایف بی آر کوں تکڑا کرݨا ہوسی، معیشت کوں دستاویزی ٻݨاوݨ ضروری اے، خصوصی سرمایہ کاری سہولت کونسل دے تحت سارے متعلقہ شراکت دار مشاورت اتے شفافیت نال کم کریندے پن، ڄڳ دا کوئی وی ملک کرنسی نال کھیݙݨ دی اجازت نئیں ݙیندا۔ اسلام آباد اچ وفاقی وزیر اطلاعات ونشریات مرتضیٰ سولنگی، وفاقی وزیر محمدعلی اتے ٻنھاں نال پریس کانفرنس کریندے انہاں آکھیا جو نگران حکومت مسلیاں توں ٻیلی نئیں پوندی، انہاں چیلنجاں تے قابو پیسوں اتے سمڄھداری نال معاملات چلائے ویسن، اخراجات ڳھٹا تے محصولات ودھاوݨ دے اقدامات کیتے ویسن۔ انہاں آکھیا جو صارفین کیتے قیمتاں دا حساس اشاریہ مئی دے 38 فیصد دی شرح توں ڳھٹ تے 26.2 فیصد دی سطح تے آ ڳئے ڄیڑھا ݙسیندے جو اساں اوکھ توں نکلدے پئے ہیں، قیمتاں اچ استحکام آسی، پیداواری شعبہ بہتر تھیندا پئے، زرعی شعبہ وی ودھ پیداوار ݙیسی اتے ساݙے ذخائر وی بہتر تھی ویسن ڄیندے نال مجموعی معیشت تے چنڳے اثرات پوسن۔ وزیر خزانہ آکھیے جو مانیٹری پالیسی کمیٹی شرح سود برقرار رکھی اے، عالمی بینک اتے ایشیائی ترقیاتی بینک نال مختلف منصوبیاں کوں فاسٹ ٹریک تے مکمل کرݨ کیتے ساݙی ڳالھ مہاڑ چلدی پئی اے، براہ راست بیرونی سرمایہ کاری ودھاوݨ کیتے اقدامات کریندے پئے ہیں، پاکستان دے زرمبادلہ دے ذخائر مستحکم ہین، ایکسچینج کمپنیاں اچ اصلاحات کیتن اتے سمگلنگ مکاؤݨ دے اقدامات وی جاری ہین۔
