اسلام آباد۔14مارچ (اے پی پی) وفاقی وزیر داخلہ و انسداد منشیات محسن نقوی سعودی عرب دے سفیر نواف بن سعیداحمد المالکی نال ملاقات کیتی جیں اچ سانجھی دلچسپی دے امور، ݙوطرفہ تعلقات دے ودھارے تے مختلف شعبیں اچ تعاون ودھاوݨ تے ڳالھ مہاڑ کیتی ڳئی ۔ وفاقی وزیر داخلہ محسن نقوی ڈپلومیٹک انکلیو اچ سعودی سفیر نال ملاقات کیتی۔سعودی سفیر وفاقی وزیر داخلہ دا عہدہ سنبھالݨ تے محسن نقوی کوں مبارخ ݙتی تے نویاں ذمے واریاں سنبھالݨ تے محسن نقوی سانڳے نیک خواہشات دا اظہار کیتے۔سعودی سفیر پنجاب اچ غیر معمولی رفتار اتے اعلی معیار نال ریکارڈ مدت اچ عوامی منصوبیں دی تکمیل تے محسن نقوی دی کارکردگی دی تعریف کیتی ۔وفاقی وزیر داخلہ محسن نقوی پنجاب حکومت نال تعاون تے سعودی سفیر دا شکریہ ادا کیتے۔وفاقی وزیر داخلہ محسن نقوی آکھیے جو سعودی عرب ہر آزمائش اچ پاکستان دا بھرپور ساتھ ݙتے۔سعودی عرب پاکستانیاں دا ݙوجھا گھر اے ۔پاکستانی قوم کوں سعودی عرب نال تعلقات تے فخر اے ۔ انہاں آکھیے تساں پاکستان اتے سعودی عرب وچال تعلقات کوں تکڑا بݨاوݨ سانڳے مثالی کردار نبھائے ۔سعودی عرب نال تاریخی دوستی تے اساں ساریں کوں ناز اے۔
