اسلام آباد۔16مئی (اے پی پی) وزیراعظم محمد شہبازشریف آکھیا جو ہاکی دے کھیݙ دی بہتری کیتے کوئی کسر نہ چھڑیسوں، یقین اے جو ہاکی دا کھیݙ ولا عروج تے ویسی۔ کھݙاریاں کوں محکمیاں اچ ولا شامل کرݨ دی پالیسی ہک ہفتے اچ عملدرآمد کیتا ونڄے۔ پاکستان ہاکی ٹیم دے کھڈاری اذلان شاہ ہاکی ٹورنامنٹ اچ ہر تے وی جت ڳئن۔ میݙی خواہش اے جو کھݙریاں دی کارکردگی اچ ماضی دے ہیروز نظر امدن۔ اے ڳالھیں انہاں خمیس کوں وزیراعظم ہاؤس اچ اذلان شاہ ہاکی ٹورنامنٹ دا فائنل کھیݙݨ آلی قومی ہاکی ٹیم دے اعزازاچ تقریب توں خطاب کریندیں ہوئیں آکھی۔ تقریب اچ وفاقی وزیر اطلاعات و نشریات عطااللہ تارڑ،وفاقی وزیر منصوبہ بندی احسن اقبال، وزیراعظم یوتھ پروگرام دے چیئرمین رانا مشہود احمد خان، وزیرمملکت برائے انفارمیشن ٹیکنالوجی شزہ فاطمہ ،پاکستان ہاکی فیڈریشن دے عہدیداراں اتے کھݙاری وی شریک تھیے۔ ایں موقع تے پاکستان ہاکی ٹیم دے سابق کپتان شہباز احمد آکھیا جو ایں تقریب اچ شریک تھی تے ٻہوں خوشی تھئی اے۔ ایں موقع تے وزیراعظم پاکستان ہاکی ٹیم دے کھݙاریاں، ایتھلیٹ ارشد ندیم اتے پیرس اولمپکس کیتے کوالیفائی کرݨ آلے رایفل شوٹنگ ٹیم اچ چیک تقسیم کیتے۔
