اسلام آباد۔28دسمبر(اے پی پی) وزیراعظم محمد شہبازشریف زرعی ترقی کوں پاکستان اچ فوڈ سکیورٹی دی ضمانت قرارݙیندے ہوئیں آکھیے جو کسان پیکیج تے عملدرآمد تکھا کیتا ویسی ، دالاں تے ٻئے اجناس دی پیداوار ودھاوݨ کیتے بہتر بج دی فراہمی یقینی بݨائی ونڄے۔ ٻدھ کوں وزیراعظم آفس دے میڈیا ونگ توں جاری بیان موجب انہاں ہدایت زرعی شعبے دی ترقی کیتے حکومت دے ݙتے ڳئے تاریخی کسان پیکیج تے جائزہ اجلاس دی صدارت کریندے ہوئیں آکھی اے ۔ اجلاس اچ وزیر خزانہ محمد اسحاق ڈار، وزیر قومی غذائی تحفظ وتحقیق چودھری طارق بشیر چیمہ، وزیر داخلہ رانا ثناءاللہ خان،وزیر صنعت سید مرتضی محمود، وزیراطلاعات مریم اورنگزیب، وزیر مملکت پٹرولیم ڈاکٹرمصدق ملک، وزیر اعظم دے معاون خصوصی ڈاکٹر جہانزیب خان، گورنر سٹیٹ بینک جمیل احمد، وزیر اعظم دے کوآرڈینیٹر رانا احسان افضل اتے متعلقہ اعلی حکام شرکت کیتی۔وزیراعظم آکھیے کسان پیکیج تے عمل درآمد کوں تکھا کیتا ونڄے، زرعی شعبے دی ترقی پاکستان اچ فوڈسکیورٹی دی ضامن اے ۔ انہاں آکھیے اساکوں ہر حال اچ پاکستان اچ غذائی تحفظ کوں یقینی بݨاوݨا اے ، ملک اچ غذائی تحفظ کیتے کݨک ، کپاہ، کنولہ اتے زیتون دی کاشت اتے پیداوار تے خصوصی توجہ ݙتی ونڄے تے کساناں کوں دالاں سودھے ٻئے غذائی اجناس دی پیداوار ودھاوݨ کیتے بہتر بجاں دی فراہمی یقینی بݨائی ونڄے۔اجلاس کوں ݙسایا ڳیا جو کسان پیکیج تے عمل درآمد کیتے نینگراں کیتے قرضہ سکیم، چھوٹے کساناں کیتے سود تے چھوٹ اتے سیلاب توں متاثرہ علاقیں اچ چھوٹے کساناں کوں بلا سود زرعی قرضے ݙیوݨ دے سلسلے اچ سٹیٹ بینک نوٹیفیکیشن دے ذریعے بینکاں کوں ہدایات جاری کرچکیے ۔اڄوکے مالی سال اچ نومبر تئیں 664 ارب دے زرعی قرضے کساناں اچ ݙتے ڳئن جیڑھے جو گزریل مالی سال دے ایں عرصے دےمقابلے اچ 36 فیصد ودھ ہن ۔
