اسلام آباد۔13اپریل (اے پی پی):سپیکر قومی اسمبلی دے خالی عہدے تے انتخاب کیتے شیڈول جاری کرݙتا ڳئے جیں موجب نویں سپیکر دا انتخاب ہفتہ 16 اپریل کوں کیتا ویسی ، ٻدھ کوں قومی اسمبلی سیکرٹریٹ دی طرفوں سارے ممبران قومی اسمبلی کوں مراسلے جاری کیتے ڳئن ۔مراسلے دے مطابق سپیکر دا انتخاب 16 اپریل 2022 ہفتے کوں تھیوݨ آلے قومی اسمبلی اجلاس اچ کیتا ویسی ۔سپیکر دے انتخاب کیتے کاغذات نامزدگی 15اپریل ݙینھ 12 وڄے تئیں سیکرٹری قومی اسمبلی کنے جمع کرائے ونڄ سڳدن ،کاغذات نامزدگی قومی اسمبلی دی شعبہ قانون سازی برانچ توں ڳھدے ونڄ سڳدن ۔نویں سپیکر دے انتخاب دی کارروائی تے طریق کار دے قاعدہ 2007 دے قاعدہ 9 دے تحت عمل اچ گھن آئی ویسی ۔یاد رہے جو سپیکر قومی اسمبلی دا عہدہ سابق اسپیکر اسد قیصر دے استعفیٰ دی وجہ توں خالی اے۔
