شديد برساتن ۽ ٻوڏ متاثرين جي 15 لک خاندانن ۾ 25 هزار في خاندان جي حساب سان 37 ارب رپيا ورهايا ويندا: وزيراعظم شهباز شريف

image
APP42-190822 ISLAMABAD: August 19 - Prime Minister Shehbaz Sharif addressing the Distribution of Cash Transfer Launch Ceremony for the flood victims. APP

اسلام آباد – 19 – آگسٽ (اي پي پي) وزيراعظم شهباز شريف چيو آهي ته شديد برساتن ۽ ٻوڏ متاثرين جي 15 لک خاندانن ۾ 25 هزار في خاندان جي حساب سان 37 ارب رپيا ورهايا ويندا، تازين برساتن ۽ بوڏ سبب شديد تباهي ٿي آهي، بلوچستان صوبو سڀ کان وڌيڪ متاثر ٿيو آهي، اسان سڀني کي گڏجي ان چئلينج کي منهن ڏيڻو آهي. اهڙن خيالن جو اظهار هن شديد برساتن ۽ ٻوڏ متاثرين ۾ روڪ مالي امداد ورهائڻ واري تقريب کي خطاب ڪندي ڪيو. ان موقعي تي وفاقي وزير مريم اورنگزيب، مفتاح اسماعيل، احسن اقبال، شاهه زين بگٽي ۽ ڪشمير ۽ گلگت بلتستان معاملن واري صلاحڪار سميت ٻيا پڻ موجود هئا. غربت جي خاتمي ۽ سماجي تحفظ واري وفاقي وزير شازيه مري تقريب ۾ آن لائين شرڪت ڪئي. وزيراعظم تقريب کي خطاب ڪندي چيو ته تازين برساتن ۽ ٻوڏ جي ڪري تمام گهڻو نقصان ٿيو آهي ۽ سوين ماڻهو فوت ۽ بي گهر ٿيا آهن، انهن جي چوپائي مال، گهرن ۽ انفراسٽرڪچر کي نقصان پهتو آهي، سڀ کان وڌيڪ تباهي بلوچستان صوبي ۾ ٿي آهي، بلوچستان ۾ بوڏ متاثرين جي لاءِ امدادي ڪاررواين دوران ڪور ڪمانڊر ڪوئيٽا سميت پاڪ فوج جا 6 آفيسر شهيد ٿيا آهن، ٻوڏ صورتحال دوران مون ذاتي طور تي پاڻ مختلف علائقن جو دورو ڪيو. هن چيو ته اين ڊي ايم اي چيئرمين ليفٽيننٽ جنرل اختر نواز ۽ صوبن ۾ پي ڊي ايم اي، صحت جي کاتن ۽ اين ايڇ اي سميت ٻين ادارن گڏجي امدادي ڪاررواين ۾ حصو ورتو. وزيراعظم چيو ته اڄ ٻيهر طوفاني برساتون شروع ٿيون آهن، سنڌ جي وڏي وزير ٻڌايو ته اندرون سنڌ ۾ شديد برساتون ٿي رهيون آهن، اهڙي طرح بلوچستان ۾ به شديد برساتن ٿي رهيون آهن. شهباز شريف چيو ته هن مشڪل گهڙيءَ ۾ پوري قومک ي متحد ٿي ان صورتحال جو مقابلو ڪرڻو آهي، صوبن ۽ عالمي حصيدارن سان گڏجي ان مشڪل صورتحال کي منهن ڏئي رهيا آهيون. هن چيو ته 15 لک متاثر خاندانن کي في خاندان 25 هزار رپيا روڪ امداد ڏني ويندي، انهن خاندان جي مجموعي ماڻهن جو انگ 90 لک بڻجي ٿو، انهن خاندان کي اها امداد بينظير انڪم سپورٽ پروگرام ذريعي شفاف طريقي سان ڏني ويندي، امداد فراهمي جي شروعات جهل مگسي کان ٿي چڪي آهي. وزيراعظم چيو ته امداد فراهمي جو اهو عمل ٽن ڏينهن ۾ مڪمل ڪيو ويندو. هن چيو ته ٻئي مرحلي جي لاءِ اين ڊي ايم اي ۽ صوبا گڏجي سروي ڪري رهيا آهن، ان سروي ۾ تعين ڪيو ويندو ته فصلن کي ڪيترو نقصان پهتو آهي، گهر جزوي يا مڪمل طور تي تباهه ٿيا آهن، رستن ۽ انفراسٽرڪچر جو ڪيترو نقصان ٿيو آهي، ان جو ڪاٿو لڳايو ويندو، صوبن سان گڏجي بحالي جي لاءِ قدم کڻنداسين. شهباز شريف چيو ته هي سڀني جي لاءِ بهترين موقعو آهي ته اسان سياسي اختلاف راءِ کي هڪ طرف رکي ڏکويل انسانيت جي خدمت ڪريون، انهن جو سهارو بڻجون، پاڪ فوج، سول ادارا ۽ وفاقي صوبائي حڪومتون بحالي جي لاءِ گڏجي ڪم ڪري رهيون آهن، سياسي فرق کان مٿانهون ٿي اسان ان چئلينج کي منهن ڏينداسين. هن چيو ته ٻوڏ متاثرين جي امداد لاءِ 37 ارب رپيا فراهم ڪرڻ تي ناڻي واري وزير جو ٿورائتو آهيان. منصوبابندي، ترقي ۽ سڌارن واري وفاقي وزير احسن اقبال تقريب کي خطاب ڪندي چيو ته ٻوڏ ۽ برساتن کان متاثر ماڻهن کي هنگامي بنيادن تي امداد فراهم ڪئي پئي وڃي، پاڪستان موسمياتي تبديلين سان سڀ کان وڌيڪ متاثر ٿيندڙ پنجن ملڪن ۾ شامل آهي جڏهن ته پاڪستان گهٽ آلودگي پيدا ڪرڻ وارن ملڪن ۾ شامل آهي. هن چيو ته وزيراعظم جي هدايت تي ٻوڏ متاثرين جي لاءِ ڪميٽي ٽن مرحلن ۾ ڪم ڪيو، پاڪ فوج ۽ لاڳاپيل صوبن جي تعاون سان متاثرين جي گهرن کي پهچندڙ نقصان جو ڪاٿو لڳايو ويندو ۽ صوبائي حڪومتن جي تعاون سان متاثرين جي بحالي جو عمل مڪمل ڪيو ويندو. غربت جي خاتمي ۽ سماجي تحفظ واري وفاقي وزير شازيه مري آن لائين خطاب ڪندي چيو ته بلوچستان، سنڌ، پنجاب سميت سمورن متاثر علائقن جي عوام سان گڏ بيٺل آهيون. هن چيو ته بينظير انڪم سپورٽ پروگرام ذريعي متاثر خاندانن کي في خاندان 25 هزار رپين جي امداد شفاف بنيادن تي فراهم ڪئي ويندي، حڪومت ٻوڏ متاثرين جي هر ممڪن مدد ڪري رهي آهي. ان موقعي تي جهل مگسي ۾ متاثرين کي امداد جي فراهمي جي شروعات ڪئي وئي آهي.

مضمون کا ماخذ : لاٹری کے انعامات