بیجنگ۔6دسمبر(اے پی پی) پاکستان دی سرکاری خبر رساں ایجنسی ایسوسی ایٹڈ پریس آف پاکستان (اے پی پی) دے منیجنگ ڈائریکٹرمحمد عاصم کھچی آکھیے جو ورلڈ میڈیا سمٹ میڈیا دے اہم مسئلیں کوں حل کرݨ تے ذرائع ابلاغ وچال تعاون کوں تکڑا بݨاوݨ سانڳے اہم پلیٹ فارم اے ۔ انہاں چینی خبر رساں ادارے شنہوا کوں ݙتے ڳئے خصوصی انٹرویو اچ ایں امیدا اظہار کیتے جو اے سربراہی اجلاس شرکا کوں ثقافتی تبادلیں، صحافتی مواد ھک ݙوجھے کوں ݙیوݨ ،ھک ݙوجھے دیاں زباناں کوں سمجھݨ اچ معاونت ، مشترکہ اقدامات، ٹیکنالوجی دی منتقلی اتےعالمی مسئلیں دی مشترکہ کوریج جیہے شعبیں اچ تعاون دے موقع ݙیسی۔ ایم ڈی اے پی پی محمد عاصم کھچی آکھیے اے سربراہی اجلاس میڈیا اداریں کیتے ھک ݙوجھے توں سکھݨ ، موقع حاصل کرݨ تے میڈیا دے ہمہ وقت ارتقا پذیرشعبے کوں پیش آندے چیلنج نال نبݨݨ سانڳے قابل قدر پلیٹ فارم اے۔ انہاں آکھیے پاکستان دی سرکاری خبر رساں ایجنسی اے پی پی تے شنہوا وچال مشترکہ پیشرفت اتے ڳالھ مہاڑ کوں ودھارا ݙیوݨ کیتے تعاون دی بھرپور صلاحیت موجود اے۔انہاں آکھیے ایہو جیہا تعاون ݙوہیں اداریں دے نقطہ نظر کیتے ھک وسیع پلیٹ فارم ، مزید جامع عالمی مکالمے کوں ودھارا ݙے سڳدے ۔ ایم ڈی اے پی پی محمد عاصم کھچی ݙوہیں میڈیا ایجنسیاں وچال نیڑے تعلقات کوں اجاگر کیتے جیں دا آغاز 1964 اچ میڈیا تعاون دی ھک کامیاب مثال دے طور تے تھیا ہئی ۔ انہاں ایں اعتماد دا اظہار کیتے جو ورلڈ میڈیا سمٹ (ڈبلیو ایم ایس) ݙوہیں اداریں دی شراکت داری کوں تکڑا بݨیسی تے انہاں کیتے نویں اقدامات دا رستہ ہموار کریسی ۔ ایم ڈی اے پی پی ذرائع ابلاغ بالخصوص ڈیجیٹل اتے سوشل میڈیا دے ودھدے اثر و رسوخ دا اعتراف کریندے ہوئیں کوڑیاں تے غیر مستند خبراں کروں روکݨ سانڳے پاکستان اتے چین وچال تعاون ودھاوݨ دی لوڑھ تے زور ݙتے۔
